Krsna Kirtana Songs est. 2001 www.kksongs.org

---

Home à Languages and Pronunciation à Indian Scripts Page à K

Song Name: Krsnotkirtana Gana Nartana (Sri Sadgosvamyastakam)

Author: Srinivasa Acarya

Book Name: None

Language: Sanskrit

(१)

कृष्णोत्कीर्तन-गान-नर्तन-परौ प्रेमामृताम्भो-निधी

धीराधीर-जन-प्रियौ प्रिय-करौ निर्मत्सरौ पूजितौ

श्री-चैतन्य-कृपा-भरौ भुवि भुवो भारावहन्तारकौ

वन्दे रूप-सनातनौ रघु-युगौ श्री-जीव-गोपालकौ

(२)

नाना-शास्त्र-विचारणैक-निपुणौ सद्धर्म-संस्थापकौ

लोकानां हित-कारिणौ त्रि-भुवने मान्यौ शरण्याकरौ

राधा-कृष्ण-पदारविन्द-भजनानन्देन मत्तालिकौ

वन्दे रूप-सनातनौ रघु-युगौ श्री-जीव-गोपालकौ

(३)

श्री-गौराण्ग-गुणानुवर्णन-विधौ श्रद्धा-समृद्ध्यन्वितौ

पापोत्ताप-निकृन्तनौ तनु-भृतां गोविन्द-गानामृतैः

आनन्दाम्बुधि-वर्धनैक-निपुणौ कैवल्य-निस्तारकौ

वन्दे रूप-सनातनौ रघु-युगौ श्री-जीव-गोपालकौ

(४)

त्यक्त्वा तूर्णमशेष-मण्डल-पति-श्रेणीं सदा तुच्छ-वत्

भूत्वा दीन-गणेशकौ करुणया कौपीन-कन्थाश्रितौ

गोपी-भाव-रसामृताब्धि-लहरी-कल्लोल-मग्नौ मुहुर्

वन्दे रूप-सनातनौ रघु-युगौ श्री-जीव-गोपालकौ

(५)

कूजत्कोकिल-हंस-सारस-गणाकीर्णे मयूराकुले

नाना-रत्न-निबद्ध-मूल-विटप-श्री-युक्त-वृन्दावने

राधा-कृष्णमहर्-निशं प्रभजतौ जीवार्थदौ यौ मुदा

वन्दे रूप-सनातनौ रघु-युगौ श्री-जीव-गोपालकौ

(६)

सङ्ख्या-पूर्वक-नाम-गान-नतिभिः कालावसानी-कृतौ

निद्राहार-विहारकादि-विजितौ चात्यन्त-दीनौ च यौ

राधा-कृष्ण-गुण-स्मृतेर्मधुरिमानन्देन सम्मोहितौ

वन्दे रूप-सनातनौ रघु-युगौ श्री-जीव-गोपालकौ

(७)

राधा-कुण्ड-तटे कलिन्द-तनया-तीरे च वंशीवटे

प्रेमोन्माद-वशादशेष-दशया ग्रस्तौ प्रमत्तौ सदा

गायन्तौ च कदा हरेर्गुण-वरं भावाभिभूतौ मुदा

वन्दे रूप-सनातनौ रघु-युगौ श्री-जीव-गोपालकौ

(८)

हे राधे व्रज-देवीके च ललिते हे नन्द-सूनो कुतः

श्री-गोवर्धन-कल्प-पादप-तले कालिन्दी-वने कुतः

घोषन्ताविति सर्वतो व्रज-पुरे खेदैर्महा-विह्वलौ

वन्दे रूप-सनातनौ रघु-युगौ श्री-जीव-गोपालकौ

UPDATED: May 15, 2010